ХАНЬДАА

Алаг зүрхний минь хайрын эзэн
Амьдралын минь ухаант түшиг
Айл гэрийн минь халамжит ээж
Алаг нүдэн сайхан бүсгүй минь ээ

Хүсэл тачаалын минь тансаг орон
Хөврөх насны минь утга учир
Хувь тавилангийн минь амин холбоо
Хүний төрхт амьд бурхан минь ээ

Төрсөн өдрөөр чинь хамт байж чадаагүй ч баярын мэндийг зүрхнийхээ угаас дэвшүүлж,
бүх газарт чинь дахин дахин үнссэн гэж тооцоорой.


Вашингтон хот
2012.02.14
Гэгээн хайрын өдөр Бүрэн эхээр нь...

ТӨРСӨН ӨДӨР

Үхэх, төрөхийн завсар
Үнэн, худлын дунд
Гуниг, жаргалын солионд
Гучин ес насалжээ

Ээж минь амьд байсан бол нэг цэцэг бариад очихсон доо ...

Вашингтон хот, 2012.01.24 Бүрэн эхээр нь...

НЭГЭН ШИНЭ ОН

Нэгэн он солигдож
Нас нэгээр нэмэгдэв
Нөхөддөө ч мэнд дэвшүүлэлгүй
Нэгийг бодогдуулан өдийг хүрэв

Намайг мэдэх хүн бүрт шинэ оны мэндийг хоцроод ч атугай дэвшүүлье. Хүлээн авна уу.

Вашингтон хот, 2012.01.06 Бүрэн эхээр нь...

СОНГО

Тэвч, тэмц, амьдар
Тэгэж үл чадваас үх
Үр хүүхэд, үргэлжлэлээ бод
Үлгэн салган бүү алх

Вашингтон, 2011.08.22 Бүрэн эхээр нь...

НЭГЭН ЖИЛ

Нэрийг нь сонссон ч хөл тавьж байгаагүй
Нэгдсэн Улсад ирсээр нэгэн жил өнгөрчээ
Төрсөн нутгаа санан бэтгэрсэн хэдий ч
Төрдөө өргөсөн тангарагаа бодон тэвчжээ

Үүрээс үдэш хүрэхийн адил хурдан өнгөрсөн ч
Үзсэн харсан, сурсан бүтээсэн зүйл арвин байжээ
Эрүүл саруул, ухаантай, ухамсартай байж
Энэ албаа нэр төртэй залгуулж байгаад буцна даа ...

Вашингтон хот
2011.07.29 Бүрэн эхээр нь...

ГАЛУУ БИД ХОЁР

Гүүрэн дээр алхаж явна
Голоор нь биш захаар нь, мэдээж
Тэр голоор нь машин унаа явах учир
Тэнд алхвал хэрэг тарих биз ...

Хар галуу нисэж явна
Баруунаас зүүн тал руу
Хаашаа явахаа мэдэж байх шиг
Булхиагүй, нэгэн зүгт нисэж байна

Энэ нөхөр юунд зорин
Эрчтэйхэн нисэж явна вэ
Ингэхэд би ч гэсэн хаашаагаа
Ингэтлээ хөлрөн алхана вэ ...

Бодоод байх юу байх вэ
Бор ходоодоо тэжээх гэсэн хоёр л байна
Нэг нь загас, жараахай руу дэвэж
Нөгөө нь ажил руугаа тэмүүлж яваа нь энэ ...


Вашингтон хот, Арлингтон хотыг холбосон Key Bridge
2011.07.27
Бүрэн эхээр нь...

УЙЛАМХАЙ

Би зүгээр л уйлчихдаг болсон
Би уйламхай болсон
Нас тэгширч яваа эр хүн
Над шиг уйлах муухай л байх

Жаргалтай газар хүн тогтдоггүй
Өвстэй газар мал тогтдоггүй гэдэг
Жаргалын орон гэмээр газар ирсээр
Өөрийгөө танихаа байтлаа бэтгэрлээ, би

Тэнэг гар вэ гэх хүн гарах биз
Тэнэг ээ би тэнэг
Тэрэн шиг үнэн юм байхгүй
Тэгээд л би уйлаад байгаа юм ...

Вашингтон хот
2011.07.07
Бүрэн эхээр нь...

АМЬД Л БАЙНА

Амьд уу гэвэл
Амьд л байна
Алив хэлээ гарга гэвэл
Айхгүй гаргаад үзүүлнэ

Надаас шүлэг нэхэх хүн
Нартад байна гэхээр сайхан ч
Бичээд сууя гэхээр
Бийр минь гологдох биз ээ, одоо

Огт бичихгүй байна уу гэж үү
Овоо их юм бичсээн
Хаана вэ гэж үү
Халуун зүрхэндээ ...

Вашингтон хот
2011.07.07
Бүрэн эхээр нь...

АГИА АХ

Ай ямар уйтай вэ
Агиа ах минь байхгүй болжээ
Сая л сонслоо
Сэтгэл хямраад хэцүү байна

Гэмгүйхэн инээмсэглэсэн царай нь
Гэн гэнэхэн орж ирээд
Эргээд хэзээ ч уулзахгүй гэхээр
Элэг зүрх эмтрэх юм даа

Ээжийн минь хайртай дүү
Энгийнээс энгийн нагац ах минь
Бурхны орон гэж байдаг бол
Баараггүй тэнд очсон байгаа ...

Вашингтон хот, 2011.03.24 Бүрэн эхээр нь...

ЭЭЖ МИНЬ ДЭЭ

Ээж минь зүүдэнд ирэв
Элдэв үг хэлэлгүй уйлах юм
Хацартаа үнсүүлээд
Хамаг байдгаараа бахиран уйлах юм, би бас ...

Гучин найман жилийн тэртээ төрүүлсэн хүүгээ
Ганц үнсээд авъя гэсэн юм болов уу, зайлуул ...

Вашингтон, 2011.01.24 Бүрэн эхээр нь...

МЭНД МЭДСҮЙ

Цаг тооллын нэгэн хэрчээс
Царайн дээрх нэгэн үрчлээс
Амьд яваа цагтаа санаж явна аа
Арван он чамайг ...

Дараагийн арван онд би байхгүй
Дараагийн хүн харин байна
Намайг байсныг тэд санахгүй
Надад тэр нь бас хамаагүй

Оны дараа он ирнэ
Одсоны дараа тэд ирнэ
Хамт байж бид чадахгүй
Хорвоо ийм л хатуу

Энэхэн цагт
Энэ шүлгийг уншиж буй бол
Та бид нэгэн цагийн хүмүүс
Танд ирж буй жилийн мэнд хүргэе, чин сэтгэлээсээ ...

2010.12.31 Вашингтон хот
Бүрэн эхээр нь...

УУЧЛААРАЙ

Зуу татах уу гэнэ
За яшиг доо гэчихлээ
Тамхи татах уу гэнэ
Татчихсоон гэчихлээ

Одоо тэгээд яах вэ гэнэ
Одоо юу, яваад л байна даа
Очих газар хол байна
Овоондоо л нэг зогсоно шүү гэв

Яасан муухай ааштай
Ямар хөгийн болоо вэ гэж байна
Би юу, би яасан юм
Бодлоо л хэлж байна гэчихлээ

Гомдож байна аа
Гомдоод бүр дуугүй болчихлоо
Эргэж хараад аргадах юм боллоо
Эргэж харж чадаагүй байтал сэрчихлээ ...

Нэг сайн найз маань
Намайг санахдаа зүүдэнд минь ирэхэд
Тоолгүй өнгөрөөчихлөө дөө, янз нь
Тоогүй юм боллоо доо, боллоо

Хэн байсныг нь ч анзааралгүй
Хэнхэглээд явсан байна, би
Зуу, янжуур надад санал болгоод
Загнуулж зүүдэлсэн хүн байна уу

Уучлаарай, найз аа гэх гэсийм ...

Вашингтон хот, 2010.11.01
Бүрэн эхээр нь...

БОДЛЫН ҮЗҮҮРТ

Бодлын үзүүрт нэгэн зүйл байна
Бодох тусам улам цаашлах мэт
Тоохгүй байхын аргагүй мөртөө
Тогтож надад баригдахгүй янзтай

Бодлын үзүүрт нэгэн зүйл байна
Бодох замд түмэн зүйл байна

Вашингтон хот, 2010.11.01 Бүрэн эхээр нь...

БОДОЛ

Зүрхний угт
Зүүдний эхэнд
Инээмсэглэсээр явах
Ижилгүй хүн байх

Амьд явах жаргал гэж
Аргагүй үнэн юм даа
Хүний хүсэл барагдах биш
Хүссээр л дуусна даа

Хар залуугаас эхэлтэй
Хайр чамайг би эс хүндэлбэл
Хорвоогийн шороо хөдөлгөсөн
Хувь тавилан минь гундах биз ээ

Вашингтон хот, 2010.10.22
Бүрэн эхээр нь...

ХҮСЭЛ

Газар хөлдөсхийгээд
Гахай өөхлөсхийгээд
Сайхан болж байгаа даа
Сэрүүн намраа эргэхийнсэн дээ

Олны хөлөөс дайжисхийгээд
Ойн гүн рүү оросхийгээд
Агаарын цэвэрт согтосхийгээд
Амьтны хөдөлгөөн анзаарсхийхсэн дээ

Санаа нийлсэн нөхөдтэйгээ
Сархад хундагалан тухласхийгээд
Янжуур нэгийг зуусхийгээд
Янз бүрийн юм хуучлахсан даа ...

Вашингтон хот, 2010.10.20 Бүрэн эхээр нь...